«Ինտերնետ Հանրություն» հասարակական կազմակերպությունը հայտարարում է Ինտերնետ կառավարման հայկական դպրոցի 2-րդ հոսքի մեկնարկը, որի տևողությունը հինգ ամիս է։
Դասընթացը կազմակեպվում է «Միացյալ Հայ Կամավորների Լիգա»-ի հետ համատեղ Հայաստանի Ամերիկյան Համալսարանում։

Ողջ դասընթացը բաժանված է վեց բաժինների՝ ներածություն, տեխնիկական, իրավական, անվտանգություն, տնտեսական և սոցիալ-մշակութային, որոնց շրջանակներում կներկայացվի, թե ինչ է ինտերնետը, ինչպես է այն աշխատում, ինչ է դոմենային անունների համակարգը, IP հասցեները, ինչ ամպային լուծումներ են տարածված, ինչպիսի կիբերհանցագործություններ են տեղի ունենում և ինչպես են պայքարում անվտանության մարմինները։ Կներկայացվեն նաև դասախոսություններ կիբերանվտանգության, սպամի և կոդավորման մասին, մարդու իրավունքները առցանց և դրանց պաշտպանության մասին, բիթքոին, բլոքչեյն տեխնոլոգիաների, արհեստական բանականության և այլ հետաքրքիր թեմաների մասին։

Թեմատիկ դասընթացներն անցկացվելու են տարբեր ձևաչափերով․ հարց ու պատասխան, բանավեճեր, վեբինարներ, ազատ քննարկումներ և այլն, որոնց ընթացքում հնարավոր կլինի կիրառել ստացված գիտելիքները։

Դասընթացը սկսվելու է 2018թ․հունվարի երկրորդ կեսից՝ շաբաթական մեկ անգամ, երեք ժամով։

Յուրաքանչյուր ամսվա վերջում պահանջվում է ներկայացնել հոդվածներ համապատասխան թեմաների շուրջ, իսկ արդեն ողջ դասընթացի վերջում ակտիվ մասնակցություն ցուցաբերած ուսանողները հնարավորություն կունենան ստանալու համապատասխան հավաստագիր։
Դպրոցի աշխատանքային լեզուն հայերենն է, թեև որոշ նյութեր և շնորհանդեսներ կարող են լինել անգլերեն լեզվով:

Դասընթացը կազմակերպվում է անվճար հիմունքներով: